అంబరాన మబ్బుల్ని చూస్తే
సంబరంగా అనిపించాలేగానీ
అంబరెల్లాల్ని వెతుక్కోకూడదు
మబ్బుల అంచుల్ని ముద్దాడే
కొబ్బరాకుల చిలిపి గిచ్చుళ్లతో
నిబ్బరంగా ఉన్న మేఘాలన్నీ
ఇబ్బడిముబ్బడిగా వర్షిస్తాయి
గుమ్మం దాటనివ్వని వర్షంలో
అమ్మ చేతిలో అరటికాయలన్నీ
కమ్మనైన సెనగపిండితో కలిసి
నెమ్మదిగా బజ్జీలైపోతుంటాయి
ఆరుబయట సత్తుగిన్నెలన్నీ
నోరుతెరుచుకు చూస్తూ ఉంటే
చూరునించి జారే చుక్కలన్నీ
తీరని దాహం తీరుస్తాయి
కాయితాలన్నీ కత్తిపడవలుగా
కరెంటులేని కష్టాలు కాస్తా
కల్మషమెరుగని ఇష్టాలుగా
కాలానికి నిలిచే ఆటలవుతాయి
మండువా లోగిలిలో ఆరేసుకున్న
కండువాలన్నీ స్నానాలాడతాయి
నిండిపోతున్న గిన్నెల్లో నీరంతా
దండగైపోతూ కాలవల్ని వెదుకుతుంది
తడిసిముద్దైన మందారాన్ని చూస్తే
మడికట్టుకున్న అమ్మలా తోస్తుంది
జడివానకు జడిసిన చిట్టిపూలన్నీ
తడికొమ్మలమాటున దాక్కుంటాయి
వానకు ముందు ఆకాశమెపుడూ
దీనవదనలా దర్శనమిస్తుంది
చినుకులన్నీ జారవిడుచుకోగానే
వినీలంగా వికసిస్తుంది
......కొచ్చెర్లకోట జగదీశ్
0 comments:
Post a Comment